Numbers tell a story, but read the whole book
January 16, 2018
Do you want to become a lion’s lunch?
February 12, 2018

Syfers vertel ‘n storie, maar lees die hele boek

Syfers vertel ‘n storie, maar lees die hele boek

Teen hierdie tyd het jy waarskynlik al die laaste sandkorrels uit jou ore gewas en die eerste van jou Nuwejaarsvoornemens laat vaar.

Die ou met die geel hare het ten minste nog nie die rooi knoppie gedruk nie, so daar is nog hoop vir ons almal in 2018.

Voor ons drome droom van ’n voorspoedige 2018, is dit dalk die moeite werd om net terug te kyk na wat 2017 opgelewer het in die finansiële markte, hoe om dit te interpreteer en wat dit moontlik, indien enigiets, sê van wat ons kan verwag van 2018.

Uit meegaande tabel kan ons sien dat ’n belegging in Suid-Afrikaanse aandele vir jou ’n opbrengs van 21% kon oplewer oor die afgelope jaar terwyl buitelandse kontant (dollars) vir jou ’n daling van bykans 10% op die hals sou haal.

Benewens die 2017-syfers is hier heelwat data en sommige daarvan het verdere verduideliking nodig.

  1. Die 21%-opbrengs op Suid-Afrikaanse aandele moet met ’n knippie sout geneem word.

Ek wil my verstout om te sê dat daar baie min sinvol gekonstrueerde portefeuljes was wat by daardie opbrengs sou uitkom bloot net omdat dit hoofsaaklik die groot gewig van Naspers in die indeks was wat hierdie prestasie teweeg gebring het.

Kyk byvoorbeeld na die vyf grootste aandelefondse in Suid-Afrika met hul prestasie vir 2017 (voor administrasie- en adviesgelde) en hul blootstelling aan Naspers soos op 31 Desember in hakies.

  • Old Mutual-beleggingsfonds: 10,94% (15,36%-blootstelling aan Naspers)
  • Allan Gray-aandelefonds: 13,95% (7,25%-blootstelling)
  • Coronation Top20: 18,09% (13,45%-blootstelling)
  • Nedgroup Investments Rainmaker: 16,51% (20,50%-blootstelling)
  • Foord-aandelefonds: 4,63% (13,6%-blootstelling)
  1. Hierdie syfers is ’n nare herinnering dat sentiment-gedrewe beleggingsbesluite amper sonder uitsondering tot ’n swak uitkoms lei.

Dink gerus terug aan toe pres. Jacob Zuma met sy volskaalse staatskaping begin het deur Nhlanhla Nene as minister van finansies te vervang met Des van Rooyen. Dit was in Desember 2015.

As jy in daardie stadium jou geld buiteland toe gevat het, sou jy ’n moeilike twee jaar beleef het, vernaam as dit nie 100% in buitelandse aandele was nie.

Sien ook wat het met die randopbrengs van dollarkontant gebeur tydens oudpres. Nelson Mandela se presidentskap.

Ten spyte van maksimum optimisme oor Suid-Afrika se toekoms, het die rand wesenlik meer verswak as wat die geval was oor die afgelope vyf jaar in ’n tydperk van maksimum pessimisme.

Indien niks anders nie, behoort dit vir ons ’n aanduiding te gee dat die poging om wisselkoersbewegings vooruit te skat (en beleggingsbesluite daarvolgens te neem) op grond van die algemene politieke klimaat en sentiment, moontlik nie ’n sinvolle manier is om jou besig te hou nie.

  1. Plaaslik genoteerde eiendom was die afgelope 23 jaar met ’n groot marge die beste bateklas om in te belê.

Dit het nie net gemaklik die beste opbrengs opgelewer nie, maar ook teen die laagste wisselvalligheid van alle groeibates.

Hierdie voorsprong sal moeilik binne die volgende vyf jaar ingehaal word, maar beleggers sal goed doen om te onthou dat die toekoms nie noodwendig (en hierdie geval waarskynlik) lyk soos die verlede nie.

  1. Oor die afgelope vyf jaar het buitelandse bates hul plaaslike eweknieë sonder uitsondering uitgestof, met buitelandse aandele (19,5% per jaar) wat Suid-Afrikaanse aandele (11,9% per jaar) die meeste geklop het.

Indien ons die Naspers-effek hier moes uithaal, sou hierdie verskil heelwat groter gewees het. Dit laat wel die vraag ontstaan of die boodskap van “vat alles buiteland toe” nie beter gekwalifiseer moet word nie.

Hoewel die wisselkoers teen huidige vlakke waarskynlik aan jou kant is, is valuasies van veral Amerikaanse aandele op rekordhoogtepunte en sou ek dink die herbalansering van portefeuljes moet oordeelkundig benader word.

  1. Buitelandse kontant (dollar) is die Landrover Defender van beleggingsvoertuie.

Dit gaan die stamperigste rit veroorsaak en heel laaste by jou bestemming aankom.

Dit is (behalwe oor die laaste vyf jaar) die swaks presterende bateklas van almal oor alle metingstydperke en het naas buitelandse eiendom die hoogste wisselvalligheid.

Daar is wel jare – soos 2001 en 2015 – wat jy jou voortande sou gee om jou hele portefeulje in dollarkontant te gehad het, maar behalwe as jy Siener van Rensburg is, is wesenlike blootstelling aan dollarkontant as langtermynbelegging waarskynlik nie ’n goeie idee nie.

Die korrelasie tussen buitelandse kontant en buitelandse effekte is ook 94%, wat beteken die gelyktydige insluiting van albei hierdie bateklasse in jou portefeulje gee dalk vir jou ’n gevoel van diversifikasie, maar dit is ’n vals gevoel.

  1. Ek hoor dikwels mense sê hulle soek iemand wat baie aktief na hul beleggings kyk en skuiwe maak as hulle sien iets gebeur.

Wel, as jy die data hiernaas neem en twee verskillende strategieë daarop toepas, naamlik:

1) Jy belê aan die begin van elke jaar in die “beste” bateklas van die vorige jaar, of

2) Jy belê aan die begin van elke jaar in die “swakste” van die vorige jaar,

sou jou gemiddelde opbrengs sedert 1996 gelyk gewees het aan onderskeidelik 10,73% en 10,58% per jaar.

Jy sou swakker gevaar het as ’n 100%-koop-en-hou-strategie in sewe van die agt individuele bateklasse.

Moet om vadersnaam nie aktiwiteit met waarde-toevoeging verwar nie. Om prestasie na te jaag of om geld te gooi na iets nét omdat dit baie gedaal het, het nie gewerk as ’n strategie oor die afgelope 23 jaar nie.

Ek sal verbaas wees as dit werk oor die volgende 23.

Ten slotte…

Nuusvloei kan ons op die verkeerde aspekte laat fokus.

Steinhoff se probleme is gewis tragies en van groot belang vir almal betrokke, maar die impak daarvan op Jan Publiek was wesenlik kleiner as wat die keuse oor batetoewysing sou wees in 2017.

Die hoeveelheid emosie wat dit egter opgewek het by pen sioenarisse oor hul blootstelling daaraan is na my mening uit proporsie.

As ons die horlosie kan terugdraai en jy kon kies om verlede jaar 100% in Amerikaanse dollars te belê (’n sogenaamde beleggingstoevlugsoord) of in die JSE (met sy Steinhoff- drama), watter een sou jy kies?

Probeer dus altyd perspektief behou wanneer jy met dramatiese nuusvloei gekonfronteer word en vra iemand om syfers in konteks te plaas alvorens jy oormatig bekommerd raak of oorhaastige besluite neem.

Andró Griessel is ’n gesertifiseerde finansiële beplanner en besturende direkteur van ProVérte Wealth & Risk Management. Volg hom op Twitter by @Andro720911. Hy skryf gereeld vir Sake.

Alhoewel alle moontlike sorg geneem is met die opstel van hierdie dokument kan die feitelike korrektheid van die inligting hierin vervat, nie gewaarborg word nie. Hierdie dokument behels nie advies nie en enigiemand wat enige finansiële optrede beoog op grond van hierdie dokument, word sterk aangeraai om eers met sy/haar persoonlike finansiële adviseur oorleg te pleeg. ProVérte Wealth & Risk Management is ‘n gemagtigde finansiële diensverskaffer met FSP no. 5966.

Andró Griessel
Show Buttons
Hide Buttons