In die versekeringswêreld is tydsberekening van kardinale belang. Een van die mees algemene foute wat polishouers maak, is om te lank te wag voordat hulle ‘n moontlike eis aanmeld – gewoonlik eers wanneer hulle ‘n dagvaarding ontvang. Teen daardie tyd kan belangrike geleenthede verlore wees.
Die doel van vroeë aanmelding is om die versekeraar in staat te stel om die saak te ondersoek terwyl getuies, bewyse en ander inligting nog vars en beskikbaar is. Die versekeraar kan ook betyds ’n kundige persoon aanstel en regshulp verleen.
Twee datums is belangrik:
- Die datum waarop die voorval plaasgevind het, bv. wanneer iemand in jou winkel gegly het.
- Die datum waarop jy van die voorval bewus geword het, selfs al het niemand dit formeel aangemeld nie.
Versekeringspolisse vereis dat alle eise “so gou as redelik moontlik” aangemeld moet word wat gewoonlik binne 30 dae moet geskied. Enige uitdrukking van voorneme om jou aanspreeklik te hou, hetsy mondelings, skriftelik, of in die vorm van ’n dagvaarding, is voldoende rede om die eis aan te meld.
Selfs al glo jy nie dat jy nalatig was nie, maar die moontlikheid bestaan dat iemand anders so kan voel, moet die voorval aangemeld word. Dit gee jou toegang tot regshulp en die versekeraar kan beheer neem oor die regsproses – ’n waardevolle voordeel in tye van stres.
Moenie wag vir die hofdatum nie. Maak seker jy stel ons betyds in kennis van ’n moontlike aanspreeklikheidseis.
Het jy ’n vraag oor aanspreeklikheidsdekking? Ons is hier om te help.